وفشلت ندوة التدوين

ربع الديوانية أكثر من جمهور الندوة

لاحظوا معاي اول اثنين داهم القحطاني وبدر بن غيث بكل مناسبة تشوف هالاثنين

حتى لو تفكر تشتري بنك ولا نقل من الدوار تشوفهم صافطين

لاحظوا الجمهور السطر الثاني أقص ايدي إذا الطرفاني من اليسار مو مباحث والأزرق إلي يمه وكيل عريف

وباقي الحضور نصهم صحفيين حتى مو كويتيين

شبغيت أقول نسيت كله منك يالهارلي

خلونا نتطمش على الندوة حسب مانقلتها جريدة الآن فيكم وناسة

خلونا نبدأ في أبوذمة صبي عيال بوخمسين خلونا نشوف شيقول

سأطرح قضية تتعلق بالنشر الإلكتروني تتعلق بي وهي قضية لو إزيلت الأسماء لأصبحت قضية عامه حيث كتبت اعترض على صفقة إنشاء محطة كهرباء بملايين ففوجئت بكتابة مقال من قبل مدون مشهور يتهمني بأن وراء الاعتراض مطالبتي بصفقة تقدر بعشر ملايين وتم وضع صورتي مع الخبر . وقمت بعرض هذا المقال في جريدة الآن واعلنت أنني سألجأ إلى القضاء ذلك أن ما نشره هذا المدون ليس من قبيل الاختلاف في الراي بل هو طعن في الذمة المالية

أفا زايد من يقول إنت تساوم ومنو يقول إن النيباري طردك من الطليعة لما ساومت شركة الإتصالات وطلبت مبلغ ومنو يقول إنك عايش على المساومات والإبتزاز ومنو يقول إن الشعبي ماسربولك الداو كيميكال وإنت ماصدقت عشان تترزق

شوف ترى آنا مدحتك عشان لاترفع علي قضية

خلونا نشوف داهم شيقول

بدأت كصحافي ثم انتقلت للتدوين كي أكتب بحرية بعيدا عن القيود التقليدية الظاهر منها والخفي وفي ظل انكماش هامش الحرية في الصحافة المطبوعة تدريجيا بسبب تضارب المصالح ورغبة ملاك الصحف وهم في الوقت نفسه ملاك كبريات الشركات بإرضاء السلطة والمتنفذين

أه يعني السالفة طق في بوعيون فتانة أفا طلعت السالفة كل واحد يبي ينفس بس مو التنفيس إلي خبركم

وربي ماكسر خاطري إلا إنت يابوعمر

وين رايح على شعار ندوتك

والحين سؤال المليون

شنو استفاد المدون إلي رز ويهه وراح للندوة الدايخة وإلي تم رصده فيها

سامحوني زوار مدونتي باخذ راحتي

ابحث عن الاجابة بين الاجابات التالية

قصت عليكم المدونة المايصة إلي قاعده تعزم بالإنترنت وبالإميلات

أو

اقتنعتوا ببراءة زايد أو بضرب بوعيون فتانة

وناسة لأن الندوة بفندق على البحر

صج تذكرت شغلة وايد مهمة

ماتلاحظون بالكويت لما يتكلمون عن القانون الشباب كلهم يصيرون قضاة

لما يتكلمون عن التدوين كلهم يصيرون مدونين وترى الفيلسوف إلي سماه أحد المعلقين على البوست السابق مايعرف كمبيوتر

حتى لما تكلموا عن مجاري مشرف كلهم قلبوا شغل صحي

وكيل مساعد في وزارة الأشغال بكل أسف ينكت يقول

فيه حل بنطالب اهل مشرف مايسحبون السيفون ليما نخلص من مشكلتنا

صج إنك وقح المفروض يسحبون عليك إنت ولولا إحترام عائلتك الكريمة جان حطيت اسمك